Ka Mōhai 'Ulu
I kekahi mau kaikamahine e pūlehu 'ulu ana i ke kula, ua kaena a'e nei lāua i ko lāua mau akua. 'I a'e nei kekahi, "'O Laka ko'u akua, he akua maika'i." 'Ōlelo maila ho'i kona kōko'olua. "O Kapo ko'u akua, he akua 'olu'olu."
Iā lāua e nanea ana i ke kaena i ko lāua akua, ua 'ō'ili maile he luahine. 'Ī maila ia i ke kaikamahine mua,"Na'u ho'i kahi 'ulu āu.""'A'ole," i pane mai ai ke kaikamahine, "na Laka ka'u 'ulu.""He akua mana nō anei 'o Laka?""'Ae, he akua mana nō.""Na'u ho'i kekahi wai o kāu hue wai.""'A'ole nō; na Laka nō kēia wai."A huli mai nei ka luahine i ka lua o ke kaikamahine a noi mai nei i ka 'ulu. Ua 'ike nō kēiā kaikamahine, 'a'ohe 'o ia i ho'ohiki i kāna 'ulu me ka 'olu'olu. I ka pau 'ana o ka 'ai 'ana a ka luahine, ua noi maila 'o ia i ka wai 'o kāna hue wai, a ua loa'a aku nō.
'Eu a'e nei ua luahine nei e hele, a ma mua o kona hele loa 'ana, 'ōlelo maila 'o ia i ka mea i hā'awi lokomaika'i aku i ka 'ulu iā ia, "Ō ho'i a hō'ike aku i kou mau mākua e ho'olako i ka hale i ka 'ai a lawa, a e kau i ka lepa i nā kihi pā ma mua o ka hala 'ana o ke anahulu." I ka hō'ike 'ana aku o kēia kaikamahine i kēia mea i kona 'ohana, ua 'ike koke maila lākou i ka lokomaika'i o ke kaikamahine iā ia.
Ua ho'okō 'ia nā kauoha a pau a i ka piha 'ana o ka 'umi lā, ua 'ika 'ia ka 'ā o ka pele i luna o Moku'āweoweo. Ua kahe ka pele i Ka'ū a ua pau kekahi po'e hale i ka luku 'ia a koe nō ka hale a me ka 'ohana o ke kaikamahine lokomaika'i.
Ua a'o mau nā mākua a me nā kūpuna i kā lākou mau pulapula 'a'ole e pī, 'a'ole ho'i e pane kīko'olā i nā malihini, o hiki mai auane'i ka lā e pane kū 'ia ai o Pele ke hele mai 'o ia, a pō'ino lākou.